الثلاثاء، فبراير 26، 2008

عصام كمال توفيق الحضري





انقسم الشارع الرياضي المصري إلى قسمين, قسم يرى أن الحضري مخطئ تمام و يجب معاقبته و قسم آخر يرى أن هذا حقه و لا غبار عليه.
أنا بس عايز أقول حاجة صغيرة...احنا عندنا في مصر عاطفيين جدا...نتكلم عن الولاء و الانتماء للنادي كأن النادي هوه الله و الأب و الأم و الوطن. بننسى ان فيه حاجة اسمها احتراف و بيع و شراء و سوق....دي مش وجهة نظر مادية...لكن العالم حوالينا هوه اللي مادي...و ما نقدرش نغيره...و انا هتحلى بالشجاعة و اقول ان الأهلي ياما زغلل عيون لعيبة كتير بملايينه...و كنت انا نفسي ادافع عن كده و اقول هيا دي الدنيا...و هوه ده اللي بيحصل في العالم كله....جه اليوم اللي يحصل مع الأهلي يبقى لازم اقول نفس الكلام برضه ماغيروش عشان اهلاوي.
فيه قوانين تحكم الأمور دي من قبل اتحادات محلية و قارية و اتحاد دولي فيدرالي....الأندية بتنشأ و تدرب و تطلع لعيبة...و بتاخد مقابل لكده بما ينص عليه القانون الذي يحكم اللعبة عند البيع ...ده غير الفايدة من حصد المسابقات و البطولات المحلية و الاقليمية...يعني النوادي و من ضمنها الأهلي مش بتعمل كده عطفا و منة...فبلاش نتكلم عن الموضوع ده بلغة العاطفة...نتكلم بلغة القانون...الحضري عايز يستفيد من بند في القانون الدولي يسمح للاعب الذي تخطى ال 28 سنة و له مع ناديه أكثر من 5 سنوات أنه يفسخ العقد من طرف واحد. و الأهلي بالمثل عايز يستفيد من بند آخر يمنع انتقال اللاعب في وسط الموسم و يقصره على فترة الانتقالات.
الموضوع خلاف قانوني بحت مش لازم ندخل فيه كلام كبير زي "الوفاء" و "الانتماء" لمصلحة الأهلي و لا "تأمين الحياة بعد الاعتزال" و "سنه كبر" لمصلحة الحضري.
الحاجة الوحيدة الأكيدة اللي غلط فيها الحضري هوه انه اتسحب زي الحرامية من غير علم حد كأنه سارق سرقة ...او كأنه خايف الأهلي يمنعه من السفر و لا حاجة لو شم خبر...لكن مش هنعلق المشنقة لواحد من أعظم حراس المرمى في مصر و اللي لعب بطولتين افريقيتين من غير ما يغلط غلطة تؤخذ عليه - و الكمال لله وحده - عشان مأحسنش التصرف في موقف واحد.

هناك 10 تعليقات:

Casper يقول...

انا مش متفق معاك يا هوك اغلب اللعيبة اللى جات الاهلى اتعرض عليها من الزمالك عروض أكبر ومع ذلك فضلوا الاهلى لأنه مش مجرد نادى
ومع ذلك سيبنا من كلام الولاء والانتماء للأهلى وخلينا فى المبادئ والقيم الراجل ده غلط ولازم يتحاسب وإلا هانلاقى كل الفرق الاوروبية تيجى تسرق لعيبتنا بملاليم فى أندية لا تذكر لا مؤاخذة يعنى الاهلى مش نادى ابو تشت عشان كل من هب ودب زى بتوع سيون دول ييجوا ياخدوا واحد من عندنا كدة بكام ملطوش وفاكرينا لما هانشوف فلوسهم هانريل
أى لاعب يغلط لازم يتحاسب مهما كان حجمه وياما الأهلى عاقب لعيبة أكبر من الحضرى وعشان كدة هو الأهلى

Hook يقول...

ماهيا القضية هوه غلط و لا لأ يا كاسبر...
و بعدين مافيش نادي في الدنيا يملك لاعب ملكية السيد لعبده...فيه عقود و قوانين...هيا دي اللي تحدد اذا كان غلطان و لا لأ...
و اي نادي كبير في الدنيا لاعيبته اللي كبروه و هوه اللي كبرهم برضه...المنفعة متبادلة يعني...الأهلي ماهوش جميعة خيرية للصدقة و الاحسان...

Cleo يقول...

لو إن الحضرى عرض الموضوع على الأهلى والنادى الأهلى هو اللى بيماطل عشان يضيع عليه العرض ويحتفظ بالحضرى لنفسه مهما كانت خسارته (راجع نظرية الست اللى جوزها معلقها زى البيت الوقف لا متطلقة ولا متجوزة)يبقى الحضرى عنده حق فى اللى عمله... لا ضرر ولا ضرار

أما لو إن الحضرى كان بيعلب على الحبلين وهرب عشن عنده فكر لئيم إنه يخاف يعلن نيته للنادى أحسن النادى يقفله فيها فقال أتغدا بيهم قبل ما يتعشوا بيا ومحدش له عندى حاجة يا كلاب وطظ فى التخين... يبقى الحضرى يستاهل يحرقوه هو شخصيا مش يحرقوا عربيته بس..

ولا اجمل .. ولا أحلى ولا أرررروع من كدة :-)

Hook يقول...

على حسب الأخبار اللي بتتنشر يا كليو النادي سيون طلب من الأهلي رسميا و بعت اكتر من فاكس...و رئيس النادي سافر غانا مخصوص و الحضري قاله روح اتفاوض مع الأهلي...الأهلي ما عطاهوش عقاد نافع...
بس برضه الحضري غلطان...كان المفروض يقول يا جماعة انا وضعي القانوني كذا و هفسخ التعاقد بناء على المادة كيت...و مع السلامة...لكن شغل نواب القروض ده شوه صورته قدام الرأي العام بصراحة

hatshipsut يقول...

هدي أعصابك يا كاسبر مش كده صحتك بالدنيا
وبعدين هي مليون يورو دي ملاليم
شكلك كده ملياردير ولا حاجة
ع العموم كلام هوك كلام مية مية والله
ينصر دينك يا استاذ ..نفيسة :)

Casper يقول...

ياخوانا انتوا بتحكوا فى ايه الاهلى عمره ماخلى لعيب يعمل كدة، عمره ماتفق مع واحد وهو لسة مرتبط بعقد مع ناديه ده حتى رجع لعيبة للاسماعيلى قبل كدة عشان الروح الرياضية (رضا وحمزة الجمل) واهو الحضرى رجع عشان عارف انه خسران فى الموضوع ده مش عشان هو عايز يعتذر والكلام الفاضى اللى هو بيقوله ده وان شاء الله ادارة الاهلى هاتاخد حق الاهلى
هو اللى خلق الحضرى يعنى ماخلقش غيره ولا هو عشان بقى احسن حارس فى افريقيا يقل ادبه؟ ده كدااااااااااب يا هوك وادارة الاهلى قالتله استنى لاخر الموسم وادارة الاهلى مابتكدبش واهو بان ولسة هايبان كمان
الأدب فضلوه على العلم والكورة وحتى البتنجان ياخوانا

Hook يقول...

يقطع هوك و سنينه...ماله هوك يا عم؟
هوه انا كنت متفق مع الحضري؟ :-)
انا بس بقول ان الفيصل هوه القانون و العقد...و زي مانت بتقول بالضبط...الموضوع مش موضوع ندم من الحضري و لا الحركات...لقى موقفه ضعيف قال الحق اصلح الدنيا اللي اتخربت دي...

بلا أهلى بلا هباب يقول...

الراجل كان نفسو يحترف قالهم يا جماعه نفسى أحترف قبل ما أطلع معاش بس تقول لمين ضيعو عليه قبل كده صفقه مع نادى تركى ودلوقتى ضيعو عليه حلم تانى وياويلو اللى يحلم فى البلد دى

غير معرف يقول...

للاسف الاهلي اصبح مؤسسة ديكتاتورية بل اصبح دولة داخل دولة وبعض المشجعين "الموتورين" فاكر ان الاهلي هو بلده وبيقول الاهلي هو مصر يبقي من حقهم يعملو في عصام اكتر من كده ويمكن يسحبو من الجنسية كمان عشان اتجرأ وخرج عن طوع الأهلي

Casper يقول...

اقول ايه غير ان اللى مايعرفش يقول عدس
ياريت ياخوانا قبل ماحد يتكلم على الاهلى يقرا التاريخ وهو يعرف يعنى ايه الاهلى