دعاة الفوضى والتخريب

دعاة الفوضى والتخريب
هذا هو الوصف الذى وصفت به الصحف القومية الداعين إلى إضراب 6 أبريل
نحن دعاة الفوضى والتخريب
نحن وليس الفاسدون الذين يعيثون فى مصر فسادا تحت حماية وسمع وبصر الحكومة
نحن وليس المتكبرون المتجبرون الكاتمون على أنفاس الشعب الكادح
نحن وليس هؤلاء الذين يستخدمون البلطجية ويحيون الموتى لكى يزوروا الانتخابات
نحن وليس من يبيع موارد مصر للأعداء ويحاصر الأصدقاء
نحن وليس من استهان بشعب مصر وجعلهم أكثر الشعوب فقرا
وأى إنتاج هذا الذى تتحدث عنه الصحف القومية؟
هل أصبحت مصر من الدول المنتجة ونحن لا ندرى
لست أدرى بماذا أيضا ستصفنا صحف الكذب والتضليل والنفاق
ربما تصفنا بأننا نتلقى أموالا من قطر أو من إيران أو حتى إسرائيل
فكل من يهاجم النظام المصرى لم يسلم من قذارة صحفنا القومية ووصلات الردح والكذب
نعم لم يستجب لنا الشعب، ليس لأنه شعب واعى منتج كما حاولت أن تقنعنا الصحف القومية، ولكن لأن معظمه شعب مغيب لا يدرى من أمره شيئا يصحو من نومه لكى يكدح ويستجدى لقمة عيشه
إنه شعب يستحق هذه النظام الفاسد الظالم
بسم الله الرحمن الرحيم، لا يغير الله ما بقوم حتى يغيروا ما بأنفسهم، صدق الله العظيم

كان نفسى أحبك يا ريس

كان نفسى أحبك يا ريس

يعنى هو أنا بينى وبينك ايه غير البلد؟

أنا لا أعرفك ولا تعرفنى، ولا فى بينى وبينك قضايا ولا حاجة لا سمح الله

وانت لا سرقت ورث ابويا ولا حاجة، انت يادوب سرقت فلوس مصر كلها وسرقت حتى أحلام الناس

كان نفسى ابصلك كدة واحس بالفخر وان انت رمز لمصر والمصريين لكن لما ببصلك الصراحة بيجيلى تلبك معوى

والله العظيم أنا مش عايز حاجة لنفسى

أنا مش عايز غير ان مصر تبقى زى أمريكا

ليه لا هو احنا اقل منهم فى ايه

هاتقولى مستحيل ؟

طيب مستحيل ليه يا ريس؟ احنا مش أقل منهم والله

يعنى هما بنى آدمين واحنا ولاد كلب مثلا؟

طيب بلاش أمريكا، المانيا ولا فرنسا

طيب ماليزيا ولا الهند حتى، على الأقل عندهم صناعة

ده انا كل مابشوف مصر كدة بيصعب عليا والله

هاتقولى وهى مصر مالها؟ هاقولك كلمة مش كويسة لامؤاخذة يعنى

معلش ماتزعلش منى، ولا ازعل براحتك مانت كدة كدة زعلان ان احنا بنتكلم

يعنى انت متوقع مننا ايه

نشوف مصر كدة ونسكت

لا صناعة ولا زراعة ولا تعليم ولا أدب ولا أخلاق

فساد وسرقة ونهب، واسطة ومحسوبية وكوسة وجهل والناس بتاكل فى بعض

ده حتى الفن فى عهدك وقع

وماتعملش نفسك مش عارف، ماهو أصلك لو مش عارف يبقى لا مؤاخذة تروح تقعد فى بيتكوا أحسن

معلش يعنى انت أكبر من ابويا آه بس دى بلدى وأنا واحد من ناسها ومن حقى احاسبك

طبعا انا عارف ان الأخوة اللى حواليك بيضحكوا عليا دلوقتى وبيقولوا ايه المجنون اللى جاى يحاسب الريس ده

بس انا طول عمرى فاهمها كدة وانت وهما لازم يفهموها كدة

انت والحكومة شغالين عند الناس ولازم بقى تسمعوا احنا عايزين نقول ايه

وماتقوليش مجلس الشعب عشان ماقولش كلام مش كويس خلينى مؤدب

يا راجل ده حتى الدور الاقليمى راح فى الكازوزة

مصر اللى كانت لما تقول كلمة فى المنطقة الكل يعمل ألف حساب بقت ملطشة

السودان والقرن الأفريقى راحوا مننا يا ريس وانت ساكت

وآدى مضيق باب المندب والقراصنة بيلعبوا فيه وانت ساكت

معقولة هى دى مصر يا ريس

مصر تدى لاسرائيل غاز طبيعى باقل من السعر العالمى وباقل حتى مننا احنا المصريين

طيب ليه وعشان ايه

سيبك من انهم اعدائنا وأعداء العروبة والاسلام والكلام الكبير ده

مش ده مورد من موارد مصر ولازم نكسب فيه ولا ايه

ولا احنا خلاص مستغنيين؟

معلش يعنى انا مش فاهمك ولا حد فاهمك، الظاهر كدة ان انت تفكيرك سابق عصرك

بينى وبينك كدة لو انت يعنى خايف من اسرائيل وأمريكا قولنا عشان نبقى فاهمين

يعنى ماتقعدش تقولنا مصر لا تقبل الضغوط والكلام اللى احنا حفظناه ده عشان انت مابتعملش منه حاجة

وبعدين الأخ محافظ أسيوط بيقول ان المسئولين اتعلموا منك كيف تدار الأزمات؟

واضح فعلا

يا راجل ده احنا فى أزمة من ساعة مانت مسكت ريس

انا آسف يا ريس، والله العظيم تلاتة كان نفسى احبك

بس للأسف مفيش حاجة فيك تتحب