الأحد، يناير ١٤، ٢٠٠٧

خايف


خايف
خايف اصارح صاحبى بعيبه
خايف اسافر لجل اللقمة
وخايف أعدى جنب الكلب
خايف لما البوكس يعدى
وخايف منك يابن الكلب
خايف رأى الغير يعاندنى
وخايف أكره خايف أحب
خايف أهاجم غلطة شايفها
وخايف أشوف غلطة من الضرب
خايف آخد تارى بايدى
وخايف ينزل فيا الضرب
وخايف ألم الموت وعذابه
وخايف اخش النار من الضرب
خايف اخش الجيش واتبهدل
خايف اتجوز خايف استندل
خايف أخلف خايف اعقر
خايف اعيش عازب ومأنبر
خايف أغنى خايف أفقر
خايف البرد خايف الحر
خايف الأسود خايف الأشقر
خايف عمرى يطول فى الفانية
خايف أموت دلوقتى فى ثانية
خايف اتنفس خايف اكتمها
خايف أجيص خايف اكتمها
خايف اقول خايف واتلب
خايف اصحى خايف أنام
خايف اعيا ولو بزكام
خايف أخاف خوفى من الرب



محمد ممتاز عبدالقادر

هناك ٧ تعليقات:

غير معرف يقول...

متشكر جداً لتعليقك على مدونتي اللي جر رجلي وخلاني انبسط بشوف مدونتك.
خالص تحياتي وإعجابي بخوفك.

غير معرف يقول...

ثم با انك شاعر محترم ومبجل كده ما تخد بيدي الله يكرمك وتقول لي رأيك في القصيدتين اللي انا ناشرهم عندي.. بس بدون مجاملة نكون شاكرين مهللين.

Ehab يقول...

يا باشا الله يخليك على مجاملتك بس انا لا شاعر ولا حاجة اغلب الشعر اللى موجود فى المدونة هنا بتاع واحد صاحبى اسمه محمد ممتاز اللى انا كاتب اسمه تحت القصيدة وعلى فكرة الراجل ده كاتب كمان وله كتب نزلت السوق، انا بس جبت الصورة اللى فوق القصيدة :) مجهود برده مش كدة؟
انا اقريت القصيدتين دول لما شفت المدونة بتاعة حضرتك كلها والصراحة ومن غير مجاملة انا شايف ان المدونة كلها مثيرة للاهتمام والقصيدتين جامدين جدا، من الاخر انت مش محتاج راى واحد زيى :)
واستكمالا بقى للصراحة وياريت ماتزعلش تعليقى على صورة عبدالناصر مكانش اعجاب انما كان سخرية لان انا مبحبش عبدالناصر وشايف انه لا كان بدر ولا حاجة، دى وجهة نظرى اللى اعتقد انها متواضعة جدا وماتهمش حد وشكرا على تعليقك

غير معرف يقول...

طيب لا بأس ما اختلفناش برضه.. اقولك ليه.. لأني وضعت العنوان في منطقة محايدة ونسبية.. لما قلت في الليلة الظلماء فالقصد انه بالنسبة لما نراه من رؤساء هذا الزمان فعبد الناصر يبدو كبدر الظلام.. واتصور انها مسألة يصعب ان يختلف عليها اثنان..
تفتكر صح؟

Ehab يقول...

مش هانختلف يا باشا لانى الصراحة شايف انه موضوع مايستاهلش المناقشة المهم ان احنا متفقين ان الواقع مش كويس ومحتاج تغيير حتى لو كنا مختلفين على طريقة التغيير، المهم ان فى حاجة متفقين عليها وشكرا مرة تانية على اهتمامك

truth يقول...

بصراحة انا خايف اكتب تعليقي علي القصيدة يا عم كسبر

Ehab يقول...

يا باشا كلنا خايفين حط خوفك على خوفى يمكن ربنا يلهمنا الشجاعة ويستعملنا ولا يستبدلنا
قول آمين