الثلاثاء، مايو ٠١، ٢٠٠٧

قصة قصيرة

بعد منتصف الليل وفى شوارع أسيوط الهادئة ظل يمشى هو وصديقه العائد منذ أيام قليلة من الخليج فى أجازة بعد سنتان من العمل المتواصل
كان يشعر أن صديقه منهك خائر القوى يبحث عن أجازة ينسى فيها هموم العمل والغربة
كان يشعر أن صديقه يفتقد كل شبر فى البلد
تكلما فى كل شئ
ذكريات الجامعة وظروف العمل وماذا ينوى كل منهما ان يفعل بحياته
تكلما عن أصدقائهما
من تزوج ومن وجد عملا ومن لم يستطع أن يجد عملا بعد
ثم تكلما عن مصر وعن أسيوط
الصديق: حلو الشغل اللى بيعمله المحافظ الجديد
هو: اه نشيط وعايز يعمل حاجة احسن من البروطة اللى قبله
الصديق: بس انا مش عاجبانى عواميد النور النيون دى، بحس ان النور الأحمر أظرف
هو: ليه بالعكس النور النيون ده مريح للعين اكتر
الصديق: بس انا سمعت ان العواميد الجديدة دى غالية اوى، بيقولوا ان الواحد ييجى بعشرين الف جنيه وشوف بقى هو جايب كام واحد
هو: ياعمى هى فلوسنا ولا هى حتى بلدنا
نظر إليه صديقه بحدة، لم يكن ينتظر أن يسمع مثل هذه الكلمة، وحتى هو نفسه لم يتخيل أنه قال هذه الكلمة
ثم أكملا طريقهما فى صمت فلم يعد هناك ما يمكن أن يقال
وبقى السؤال فى رأسيهما يمشى معهما ويدور حولهما
ياترى هى بلدنا؟

هناك ١٤ تعليقًا:

غير معرف يقول...

لا يا باشا بلدنا و امرها يهمنا كلنا
بس ف ناس فقدت الامل و الاحساس بذلك
بس دى مشكلتها
ف ناس متغربه ف بلدها بمزاجها
لكنها بلدنا و بنحبها بكل احزانها و افراحها
بلدنننننننننننننننننننا

احمد عثمان

Ehab يقول...

آدى واحد جاوب على السؤال
عمى أحمد عثمان قال انها بلدنا

سندباد يقول...

اه بلدنا بس للاسف قدروا يخلوا الناس بلا هوية
تحياتي ياكاسبر بسيطة القصة بس المعني كبير قوي وهي دي ميزتك السهل الممتنع

Ehab يقول...

متشكرين با سندباد باشا
لما ييجى المدح من واحد بيعرف معنى الكلمة زيك يبقى كبير اوى عندى

غير معرف يقول...

بلدنا؟؟؟
معتقدش ان كنا لا عارفين ناخد حق فيها ولا عارفين نأديلها واجب ولا عارفين نكرها ولا عارفين نحبها بلدنا منين؟؟؟ان كان كل حاجة فيها مش ملكنا ولا احنا ملكها
يمكن في يوم هتبقى بلدناويمكن لأ
بس والله انا عاجباني عواميد النور.حلوة بجد
سوسة

Ehab يقول...

والله وانا عاجبانى بس مش عارف ليه صاحبى مش عاجباه
قال غالية قال زى مايكون هو وزير المالية

غير معرف يقول...

هاقول كلمتين
كلمتين يا مصر يمكن هم اخر كلمتين

ايوة فعلا العواميد حلوة ومنورة البلد وخلت الليل نهار مش عارف متضايقين منها ليه
انا عن نفسي متحمس جدا لللي بيعمله المحافظ
ودي بلدنا امال بلد مين يعني واي حاجة بتحصل فيها اكيد احنا لينا يد حتي لو كان فساد وتدهور اقتصادي واخلاقي وعلمي احنا برضه السبب فيه مش هانرمي كل شئ علي الحكومة والحاكم لاننا في ايدينا كل حاجة بس مش بنعمل حاجة

Ehab يقول...

والله كلام منطقى جدا ووجهة نظر ليها احترامها

Hook يقول...

أكيد بدلنا...و اللي بيحصل فيها الناس مشتركة فيه مع الحكومة...
بس الكومة هيا اللي ممكن ننتقدها...و نقولها عملتي ليه يا حكومة و ما عملتيش ليه...
سيادة البيه المسؤول...اسمه "مسؤول"...يعني يسأل عما يفعل...يتحاسب ...يكافأ أو يعاقب...
سلوك الشعب سببه غياب الحكومة...الناس بتاكل في بعضيها عشان مش لاقيين حكومة تجيبلهم حقهم...

Hook يقول...

أنا أول مرة ادخل على التعليقات...و فوجئت ان فيه بنات حواء هنا معانا كمان...
قوم فز ياد منك له وسعو مكان!!!

Ehab يقول...

انا يا باشا فزيت من زمان والله
كلامك يا احمد بيه يتلخص فى كلمتين إن صلح الراعى تصلح الرعية
وعلى رأى شعبولا بس خلاص

غير معرف يقول...

ايه ته تو
انا سمعت انه فيه حريم هنا وسايبنى قاعد ببنطلون الترنك والفانله الحملات مش منظر يا جدعان اخش البس الحته العبايه اللى جيبهالى جوز خالتى من السعوديه على الشبب الجديد ابو صابع علشان طقم الروشنه يكمل يا معلم واختطف انظار البنات كعهدكم بى .

تعليقا على موضوع ابو الكابتين كاسبر
انا شايف من وجهه نظرى البسيطه ان احنا عايشين اغراب فى بلدنا والدليل قالوله انا هقولك مثال بسيط تخيل لو سايح لومؤاخذه ميسواش اتنين دولار فى بلدهم وتلاقيه من حوارى شيكاغوا ومعاه دبلوم وربنا كرمه من نصبايه بقرشين حلوين قال يجى يتسيح بيهم عندنا فى مصر تخيل بقى ان الراجل ده ليه وضع وبيتعمله الف حساب اكتر منك انت يا معفن يا اللى المفروض تجرات وحطيت راسك براسه ده يا عم سايح اينعم وممكن يبهدلك هدومك بس لما بيجى هنا بيدخل على رتبه وزير تخيل انت بقى يا غلبان لو روحت عندهم هناك على نفس المسمى انك سايح شوف هتتعامل ازاى مش هقول ازاى لان كلكم عارفين ازاى ومايزال السؤال مطروحا يا ترى البلد دى بلدنا ؟؟؟؟؟؟

Ehab يقول...

لا تعليق انا سالت السؤال وكل واحد يقول رأيه انا عن نفسى مش عارف

Ehab يقول...

انا نسيت موضوع الترنك ده يابو ....
طول عمرك شياكة واخر رواشة
وريهم الشياكة