دليل البرامج الحوارية

نقدم لك عزيزي المشاهد, في السطور القليلة التالية دليل البرامج الحوارية, تخفيفا عليك من أعراض تلك البرامج من ارتفاع ضغط الدم و الجلطة المخية و غيرها.
محور هذا الدليل هو الإجابة على سؤال بسيط...مَن مٍن ضيوف تلك البرامج على حق و من على باطل؟ و سنحاول تلخيص الإجابة في نقاط محددة.
هل نسينا شيئا؟ لا؟...إذن فالنبدأ على بركة الله.
سيداتي آنساتي سادتي نحييكم من استاد النايل سات الفضائي و نقدم لكم من جديد إحدى اللقاءات الهامة و المثيرة بين فريق الحق و فريق الباطل...لو انت قاعد في مقصورة الاستاد يبقى فريق الحق على يمينك لابس الفانلة و الشورت الأبيض و فريق الباطل على شمالك لابس الفانلة و الشورت الأسود.
(ملاحظة: مش عايزين تلقيح كلام على الألوان هنا...الأهلي أهلي و الزمالك زمالك!!)
و في هذه اللحظة يطلق مقدم البرنامج صفارة بدأ المباراة – بعد إعلان فودا فون و جبنة طعمة طبعا – لتبدأ إحدى اللقاءات الحماسية و المثيرة بين الفريقين....
تعالو أعزائي المشاهدين الغلبانين نحاول نتعرف على الأسلحة و الدفاعات التي أعدها بها كل فريق لمباراة الليلة...
الصوت العالي:
عادة هنلاقي فريق الباطل يتحدث كأنه مافيش تلفزيون بينقل الحدث, بل إن عليه انه يوصل صوته للمشاهدين جميعا بمجهوده الفردي و بقوته أحباله الصوتية, عملا بمبدأ "خدوهم بالصوت". و عادة أيضا نجد ان فريق الحق منزعج من هذا الصوت العالي.
و على الطرف الآخر نجد أن فريق الحق صوته عادي, قد يعلو – على حسب استفزاز فريق الباطل له – و لكنه ليس عاليا على طول المباراة.
التحضير للهجمة:
فريق الباطل بما انه يعرف ان مهمته في اللقاء هي الكذب و لا شيء غير ذلك, فهو لا يقوم بالتحضير لهذا اللقاء تقريبا...مستهينا بمهمته و مغترا بموهبة الكذب, التي هي موهبة حباها الله للكثير من عباده الدناديف.
على العكس كثيرا ما يكون فريق الحق مزاكر كويس و مجهز النقاط اللي هيتكلم فيها زيه زي معد البرنامج. وممكن لو كان أكثر تنظيما انه يكتب في وريقة صغيرة بعض النقاط التي سيرد عليها لما يجي دوره في الكلام. و هذا يقودنا للنقطة التالية.
المقاطعة:
لا مش مقاطعة كنتاكي و ماكدونالدز, بل مقاطعة فريق الحق أو المقدم حين يتكلم. نجد هذا التصرف من فريق الباطل لسبب بسيط جدا زي ما قلنا أنه مش مزاكر و مش بيكتب نقاط...ما يصدق يسمع نقطة معينة يروح مقاطع و يرد على طول من غير احترام للفريق التاني اللي عايز يتكلم...يعني الراجل معذور برضه.
أحيانا في هذه الحالات قد يعلو صوت فريق الحق مطالبا بفرصته في الحديث.
بينما عادة ما يكون فريق الحق أكثر احتراما لفرصة الحديث للفريق الآخر. و بمعنى آخر لو ان مقدم البرنامج شخصيته ضعيفة, هيكون البرنامج عبارة عن جعجعة من فريق الباطل و جمل مقتطعة من فرق الحق, و يتحول الحوار إلى خوار.
الجدية و الاستظراف:
كثيرا ما يكون فريق الحق أكثر جدية من فريق الباطل في المباراة. بينما فريق الباطل يحاول دائما الاستظراف و القاء الدعابات السخفية خاصة لو كانت مقدمة البرنامج التي امامه سيدة. و ده محاول للتغطية على الكذب المفضوح اللي ما بطلش يخرج من بقه طول اللقاء, و كجزء من طبيعة الراجل اللعوب انه ينال إعجاب الست اللي قدامه, بينما كرشه يتدلى متر إلا ربع من فوق الحزام.
السؤال و الإجابة:
عندما يسأل – بضم الياء لأني مش عارف فين الضمة على الكيبورد – فريق الباطل...تلاقيه يجاوب أجابة مالهاش علاقة بالسؤال. زي واحد صاحبي زمالكاوي كل ما اكلمه عن الاهلي و الزمالك تكون إجابته متعلقة باقتصاد الصناعات الصغيرة في موزمبيق أو ميكانيكا الكم. (ما علينا...الزمالكوية حبايبنا).
و عادة ما تكون اجابته – فريق الباطل مش صاحبي الزمالكاوي – عبارة عن كلمة...ثم سكوت....أو "إإإإإ"...كلمة تانية ثم "أأأأأ"...في الآخر لما تجمع الكلمات اللي قالها عشان تكوّن جملة تتطلعلك جملة مالهاش معنى.
ضعف الحجة:
أسهل دفاع عند طريق الباطل لما تقوله "ده حصل كذا و كذا!!"...يقولك "يا راجل و ده معقولة يحصل كذا و كذا؟"...تقوله "ايه اللي يخلي الحاجة الفلانية دي تحصل؟" يقولك "انت راجل مثقف و متعلم...معقولة تصدق ان الحاجة دي حصلت؟"...هو جاي ينفي من الآخر....أي إجابة تسألهاله غالبا هيكون إجابتها بالنفي.
على عكس فريق الحق اللي بيكون معاه ادلة و استنتاجات و أحيانا أرقام و احصاءات.
الألقاب:
يا بيه و يا باشا و معاليك و جنابك...لحد ما تحس أن قاعد في اجتماع أمانة الحزب الوطني! دي الألقاب اللي هيهري بيها فريق الباطل جميع من يتواجد في موقع اللقاء من اول المخرج لحد عامل البوفيه, مش احتراما و توقريرا ليهم, بل لأنه اتعود على كده من ساعة ما يصحى لحد ما ينام...معرفش بيتعامل مع مراته و ولاده ازاي في البيت, لكن ممكن اتخيل.
بينما هتلاقي فريق الحق أكبر حاجة ممكن يقولها هي "حضرتك".


و في النهاية أحب أنوه للسادة المشاهين ان الدليل ده تمت كتابته على اعتبار ان المشاهد من مشجعي فريق الحق...لو كنت من مشجعي فريق الباطل فيا ريت تعكس كل المفردات و الكلمات اللي فيه ثم أعد قراءته مرة تانية. و يكون أحسن لو تمشي من هنا حالا و ما تجيش المدونة بتاعتنا تاني!

و الآن أعزائي المشاهدين أترككم مع إعلان بايسن...كلك حركات.