الاثنين، نوفمبر 09، 2009

مواطن مصري أعزب عاطل ذكر - الأرض بتتكلم عربى

الارض بتتكلم عربي

لو الارض في مصر بتتكلم حتقولك علاطول خدوا بعضكوا من البلد دي وامشوا، تقربيا ما بقاش للواحد اكل عيش في البلد دي

ولفظة اكل عيش دي ما بقتشي تعبير مجازي زي ما كان بيتقال زمان كناية عن صعوبة المعيشة، لا المعني دلوقتي حرفي ودقيق تماما ودقيق مسوس كمان ومليان حشرات

العيش دلوقتي بقي بالبطاقة وكميته محددة - يمكن علشان برضة لسة البلد خايفة علينا من زيادة جرعة القمح الفاسدة فمحددة كمية العيش لكل مواطن؟- برضه احتمال

طيب لو سبت البلد دلوقتي تسيبها بكام وتروح فين دول برة بيمشوا المصريين من هناك

بس في حل ظريف للموضوع ده، ممكن تعمل نفسك مواطن اجنبي وتطلب حق اللجوء لبلدك الاصلية يعني تقطع اي اثبات شخصية ليك وتتكلم بلغة غريبة فيرحلوك علي هناك، المشكلة انهم برضه في الحالة دي حيجيبوا الملف بتاعك و صورتك ويعرفوا انك مصري وابن مصري، طيب ايه العمل؟ مبدئيا اديني قاعد في البيت واكل شارب نايم كافي خيري شري، الحمد لله دي مش حالتي لوحدي دي حالة ناس كتير دلوقتي في مصر منهم من قضي نحبه ومنهم من ينتظر وما بدلوا تبديلا

واليكم ايها السادة الافاضل بعض الطرق ووسائل البقاء علي قيد الحياة باقل مبلغ من المال لاطول فترة ممكنة

نصائح للذكورالعواطلية معدومي الموهبة

- التخلي فورا عن اية عادات ادمانية تبعزق الفلوس مثل التدخين او المكيفات بانوعها والاكتفاء بشم الروائح الطبيعية والبيولوجية المنبعثة من الجسم فهي تفي بعمل احلي دماغ

- الرضا بالقليل من حيث نوعية الاكل المقدمة في المنزل، احمد ربنا ان فيه حد بيعبرك بالاكل يعني هي الارانب اللي في القفص بتتمرد علي البرسيم اللي بيتحط ليها كل اللي قدامك واحمد ربنا ان فيه حد قانيك

- اشعار من حولك بالمنزل ان ليك فايدة ايا كانت مثل قضاء الطلبات من الخارج او تسلية الموجودين من الاهل والضيوف لان غالبا قعدتك في البيت حتطول لازم تبقي خفيف وغير محسوس

- تقوية علاقاتك مع اصحاب البيت - ده في حالة اذا كان البيت بتاعكوا ايجار- ممكن القوانين تتغير في اي لحظة خليك كويس معاهم او علي الاقل غير مثير للمشاكل محدش لاقي بيوت اليومين دول

- اطلاق اشاعات مقصودة من ان لاخر عن مشاريع وافكار لشركات سوف تقوم بها او تدرسها فعلا ولا باس من اشاعات للبحث عن بنت الحلال وعدم تمكنك من العثور عليها حتي الان وان هذا –للاسف- هو سبب تاخرك في الزواج هذا افضل من تلقي اشاعات مضادة من جهات غير معلومة تتهمك بالشذوذ او المرض النفسي او الانحراف السيكوباتي

- من وقت لاخر اخترع لنفسك اية سفرية للقاهرة او اية بلد لك فيها صديق او قريب ممكن يشيلك كام يوم اهو منه تغيير ومنه اعطاء ايحاء للناس بانك شغال او بتدور علي حاجة وبرضة التغيير مطلوب

تجنب حضور الافراح وكتب الكتاب اوحفلات الجبانيوت ونص الاكليل للسادة الاقباط قدر الامكان باية حجة ممكنة ليه بقي؟

لانك كدة كدة حتطلع بذنب يا اما حتحسد الناس علي اللي انت مش طايله يا اما حيتريقوا علي تاخرك في

الجواز بعبارات من قبيل ما تشوفلك عروسة بقي او امتي حنفرح بيك قال يعني انت مش عارف تشوف اوالمشكلة بقت في الشوفان، مش لما اشتغل الاول والاقي اصرف علي نفسي ابقي اشوف ولا اتنيل

المهم ان في بلدنا بنت المت......ضايقة دي اسهل حاجة اي واحد يشوفلك عروسة ولو طلبت منه شغل يعمل نفسه مش سامع هي ايه دي هي عروسة حلاوة حاكلها ولا هما فاهمين ايه بالظبط، المهم يستحسن تبعد عن المناسبات السمجة دي وتريح اعصابك ياما حضرنا وياما رقصنا في افراح ونشنا علي بنات و حلمنا لغاية ما وصلناهم لبيت عدلهم والحمد لله مش ناقصة

- بالعكس بقي اكثر من حضور الجنازات والمشي فيها اهو منه ثواب ومنه تهدي اعصابك وتعرف انه كله في النهاية محصل بعضه يعني هي الناس اللي اتجوزت وسافرت وخلفت ما هي ماتت اهه وما خدتشي حاجة معاها، في الاخر طبعا هو نوع من التهدئة السلبية يمكن ناس كتير ما تحبش او ما تعترفشي بكدة بس فعلا الموضوع ده فعال وبيهدي خالص

- المشي يوميا لمدة لاتقل عن نصف ساعة او لمسافة 2 كيلو، منه تهد نفسك وتهديها وياريت يبقي التسكع علي اطراف البلد بعيد عن مناطق الزحمة وتجمعات الناس ومش حستهبل عليك واقولك اشترك في جيم ولا اجري في التراك او انضم لفريق التجديف بتاع نادي الصيد لانه لا صحتنا ولا فلوسنا حاليا تسمح لينا بكدة المشي رخيص ومفيد وبرضه لعلمكم حتي حياة البطالة محتاجة لياقة بدنية لمقاومة عوامل التعرية وظروف النحت من فوق ومن تحت، ده بالعكس بقى العواطلي مننا محتاج اكتر من غيره لصحته وعافيته لانه ما حلتوش غيرها

- هناك بعض الهوايات المفيدة وغير المكلفة بل والمضيعة للوقت والمربحة ايضا زي صيد السمك، اكيد جمب بيتكم ترعة او بحر، حتة بوصة وسنارة واقعد صيد ساعة اتنين تلاتة حتي يومين تلاتة وراك ايه يعني، لا حد يفتقدك ولا حد عاوزك ترجع البيت من اصله، والله طلعت حاجة خير وبركة اديك جبت عشاك ماجبتش اديك هديت اعصابك وضيعت جزء من يومك الممل بعيد عن البيت

هناك 5 تعليقات:

z!zOoOo يقول...

السلام عليكم

كل عام وانتم بخير

كل عام وانتم إلي الله اقرب واعبد

هدنا الي إلي ارشد أمره ووفقنا لما يحبه ويرضاه

عيد سعيد عليكم جميعا

تحياتي القلبيه

:)

Mohamed يقول...

انا شامم ريحه ممتاز في الكلام ده.. كل سنه وانتوا طيبين يا ولاد

ثابت

Casper يقول...

هو بغباوته يا ثبوتى
وانت طيب يا مان واحشنى والله

غير معرف يقول...

فعلا ريحه ممتاز ف المقاله دى واضحه و صريحه
ربنا يهديك و تلاقى بنت الحلال يا ممتاز
ع فكرة عندى لك عروسه زى فل بس انوى و من غير مقالات هههههه
اخوك
احمد عثمان

Casper يقول...

ابو عثمان حبيبى واحشنى والله