الاثنين، سبتمبر 11، 2006

البيت الأبيض



حبسونى وضربونى عشان سألت الباشا المسئول فى ندوة معسكر الشباب سؤال غير اللى كان مفروض عليه اسأله

استدعوا طلبة التيار الاسلامى فى جامعة أسيوط للتحقيق عشان عملوا معرض اسلامى

ضغطوا على والدى عشان يمنعنى ادى دروس تحفيظ قرآن فى جمعية أهلية
رفد العديد من طلبة جامعة أسيوط للقيام بمظاهرات لدعم القضية الفلسطينية والاحتجاج على تدنيس المصحف الشريف فى معتقل جوانتنامو
فتحولى ملف عشان روحت أخد اذن أمن الكلية اعمل مظاهرة سلمية تأييدا لانتفاضة الأقصى
القبض على امام مصلى كلية تجارة جامعة أسيوط لصلاته صلاة الغائب على شهداء انتفاضة الأقصى
الكلام ده كله هاتسمعوه من أهل أسيوط وهما بيحكوا عن البيت الأبيض
والبيت الأبيض للى مش عايشين فى أسيوط هو الاسم اللى اتفق عليه الأسايطة لتسمية مبنى جهاز إرهاب الدولة أو جهاز أمن النظام سموه زى ما تسموه ومش عارف التسمية دى جات منين يمكن عشان المبنى فعلا لونه أبيض، المهم ان الاسم فى محله تماما وهو ده اللى بنسميه الوعى الشعبى وروح الدعابة المصرية
المهم ان واحنا بنقول الكلام ده ممكن يطلعلنا دلوقتى من الموقع اللواء السابق نبيل لوقا اللى بيجيبوه فى برنامج الحقيقة فى دريم بصوته اللى بيخوفوا بيه العيال عشان يدافع عن الحكومة والداخلية ويقول "لأ محصلشى" أو "مصر دولة مؤسسات" أو "قدموا بلاغ" ومش عارف ليه كان كل مايقول كلمة قدموا بلاغ دى احس انه بيقولنا اخبطوا دماغكوا فى الحيطة، هو مايعرفش ان الشكوى فى مصر لغير الله مذلة؟ يا جدعان حد يقوله يمكن مش عارف
ولا يجيبولنا اللوا التانى اللى بيطلع معاه ده واللى ألف نظرية جديدة اسمها سحل الشعب عشان مصر، كان أولى بيه يقول سحل الشعب عشان النظام اللى هو وأمثاله بيستفيدوا منه
ولا حول ولا قوة إلا بالله وربنا عالظالم والمفترى
ويسقط البيت الأبيض سواء فى امريكا ولا فى أسيوط

هناك 5 تعليقات:

Hisham.Salah يقول...

هما مين و إحنا مين ...


هما مين و إ حنا مين .. ؟

هما الأمرا و السلاطين ..

هما المال و الحكم معاهم ..

و إحنا الفقرا المحرومين

حزر فزر شغّـل مخك

شوف مين فينا بيحكم مين ؟!!

هما مين و إحنا مين ؟؟

هما مين و إحنا مين

هما الامرا و السلاطين

هما مناظر بالمزيكا

و الزفة و شغل البوليتيكا

و دماغهم طبعاً استيكا

بس البركة بالميازين

حزر .. فزر شغل مخك

شوف مين فينا بيخدع مين ..؟؟؟!!!


هما مين و إحنا مين

هما الامرا و السلاطين

هما بيلبسوا أخر موضة

و إحنا بنسكن سبعة في أوضة

هما بياكلوا حمام و فراخ

و إحنا الفول دوخنا و داخ

هما بيمشوا بطيارات

و إحنا نموت بالاوتوبيسات

هما حياتهم بامب جميلة

هما فصيلة و إحنا فصيلة


حادي يا بادي يا عبد الهادي

يا اللي عليك قصد الغنوادي

لما الشعب يقوم و ينادي

يا إحنا يا هما في الدنيا دي

حزر فزر .. شغل مخك

شوف مين فينا حيغلب مين





هما الامرا و السلاطين

هما الفيلا و العربية

و النساوين المتنقية

حيوانات استهلاكية

شغلتهم حشو المصارين

حزر فزر شغل مخك

شوف مين فينا بياكل مين ..؟؟!!!








جميله المدونه يا أيهاب ، وربنا يجعل كلمنا خفيف عليهم ;)

Casper يقول...

تشكر يا هش واللهم آمين

kolo_tamam يقول...

ميه ميه يا مان بس احنا عايزين الصور والحركات ديه وانا اوعدك انى هحاول احطلك مواضيع بالصور وكله تمام كله تمام

غير معرف يقول...

انا يا جماعة مش عارف انتوا ليه جايين على الشرطة كدا اوى وصعقت من كلام الاخ اللى بيقول الضابط بيلعب على الموبايل .. كفاية الضغوط اللى بتبقى عليه حط نفسك مكانه شوف هتبقى عامل ازاى واوه شوية تفاريح كدا عادى لكنهم للامانة ضباط اسيوط افضل ضباط شرطة فى مصر ..
اخوكم ميلاد حنا .. شركة فريال

kolo_tamam يقول...

الى الاخ ميلاد
انا عارف انته كان قصدك تعلق على الموضوع بتاعى بس يا حرام انته ماعرفتش علشان شكلك جديد لسه بس ولا يهمك يا ميشو