ربنا يشفى

من موقع محافظة أسيوط لفت نظرى مقالة بعنوان "نستفهم ولا نتهم، هيئة المكتب وأنا" بقلم واحد اسمه عبده التناغى بيقول فيها إن من أول اجتماع للمكتب السياسى الجديد للحزب الوطنى بأسيوط أدرك آل إن اختيارات الرئيس مبارك كانت موفقة آل وإن الشخصيات المختارة لاقت استحسان وقبول الأوساط الشعبية، والصراحة انا مش فاهم منه حاجة لأن لو نزلنا الشارع وسألنا أى حد مين أمين الحزب الوطنى الجديد فى أسيوط بعد اللى مايتسمى عبدالمحسن صالح هايقولك معرفش إنما أى حد بعد اللى مايتسمى يبقى كويس، إنما الأخ عبده ده بيقولنا إن أمين الحزب الوطنى الجديد راجل ذو دراية آل وحنكة سياسية وإن المحافظ الجديد معجزة، ياعم الحج ايه الكلام الكبير ده هدى نفسك هو المحافظ الجديد كويس وبيعمل إصلاحات فى البلد مش زى الحج اللى قبله اللى ماشوفناش وشه إنما مش معجزة يعنى اومال المحجوب بتاع اسكندرية يبقى ايه؟ بلاش بقى شغل النفاق ده وبطلوا كلام فاضى، وبعدين هو شعب أسيوط هايستفيد ايه من أمين الحزب الوطنى، ده احنا مابنفتكروش غير أيام انتخابات مجلس الشعب عشان نعرف مين البلوة الجديدة اللى اتبلينا بيها عشان تنجح فى الانتخابات

للأسف هى دى مشكلة الحزب الوطنى سواء بفكره القديم ولا الجديد لأنى الصراحة مش شايف فرق بين القديم والجديد اهو كله زفت ونفاق وكل اللى فيه بيدور على مصلحته الشخصية إنما مايهموش الناس فى حاجة

والأخ كاتب المقالة اللى أنا ماسمعتش اسمه قبل كدة وقعدت اسأل الناس عليه يمكن حد يعرفه لكن مالقيتش حد يعرفه، آل يقولك المكتب وأنا، آل يعنى شخصية مهمة وبيسألنا فى آخر المقال هل أنتهم مدركون؟ انت بتسأل مين يا حج؟ وايه اللى انت عايزنا ندركه؟ إن اختيارات الرئيس فى محلها يعنى؟ ولا ايه مش فاهم

صحيح لله فى خلقه شئون وربنا يشفى