الثلاثاء، أكتوبر ٠٢، ٢٠٠٧

سقف الغرفة

مستلقيا على الفراش احدق فى سقف الغرفة
ياااااااه أخيرا هانام
الفاتحة وآية الكرسى وآخر سورة البقرة وقل هو الله أحد والمعوذتين
حبة أدعية والشهادة
تمام كدة الواحد مستعد للموت الأصغر أو النوم ويجوز تقلب لموت أكبر محدش عارف
تقابلنى كتير وشوش، قلوب زى البيوت، طريق مبعرفوش، يوماتى عليه بفوت، يوماتى عليه بفوت، سنة وراها سنة، أضيع هناك هنا، فى رحلتى أنا، الدمعة ليها صوت، الدمعة ليها صووووت
يا سلام منير ده فنان، مش تامر حسنى بتاع لو وقفتى على دماغك، فى واحدة محترمة تقف على دماغها؟، ده عمرو دياب بالنسباله قمة فى الأدب والاحترام
فعلا النظرية النسبية بتاعة أينشتين مش للوقت بس، دى للناس كمان
الواحد عايز يبقى يبص شوية فى النظرية النسبية دى يمكن أفهم حاجة
بس هافهم ايه؟ ده انا كنت أدبى وحمار بديل فى الرياضة
آه والله الواحد عايز يلعب شوية رياضة الواحد مفاصله بقت بتزيق زى مايكون عايزة تشحيم
بس الجون التانى بتاع الاهلى فى ماتش الاتصالات النهاردة كان حكاية، الواد بركات ده لعيب والله
ويانا يالسفارة فى قلب العمارة، ايه يانا يالسفارة فى قلب العمارة ده؟
آه ده صوت التليفزيون، مين اللى مشغل التليفزيون دلوقتى؟
انهض من الفراش لأجد ابن اختى الصغير يشاهد التليفزيون
قوم ياد خش نام يلا، بتبرتطم تقول ايه ياد؟
اطفى التليفزيون والنور ثم اعود للفراش
الواد بيبرتطم، شوية وهاييجى يدينى قلمين
عيال ايه دى اللى تسهر لحد دلوقتى تتفرج على التليفزيون، على كدة ماكناش عيال احنا
والله الدنيا قل خيرها خلاص
حتى رمضان مابقيش زى زمان وبرامج التليفزيون فى رمضان مابقيتش زى زمان
بس السنادى مسلسل الملك فاروق ده أستذة عالاخر، والله لولا المسلسل ده مكانش الواحد فتح التليفزيون من اساسه
طبيعى يكون كويس عشان المخرج بتاعه سورى لو كان مصرى كان فقعلى مرارتى
ويقولك مصر هوليود الشرق قال
الغريبة ان الملك فاروق كان بيعافر مع الانجليز وهما عنده هنا فى البلد امال ياخويا مبارك مش عارف يعافر مع الامريكان شوية وهما بعيد ليه
حتى على الاقل يعمله منظر، صحيح اسد عليا وعلى الاخرين نعامة
والبرنامج بتاع ابراهيم عيسى برنامج حلو بردو
ربنا يستر على ابراهيم عيسى لايتحبس
ياخى الواحد مش فاهم لما ابراهيم عيسى ده يتحبس امال ولاد الكلب اللى بينعروا فى الكليبات دول نعمل فيهم ايه
ورجال الاعمال والوزرا الحرامية نعمل معاهم ايه
هى مصر كدة الفالح فيها مالوش نصيب
ايه الضلمة دى؟ وليه الرعب ده بقى؟
آه ده انا افتكرت، عايز ابقى اروح اشوف د. أحمد خالد توفيق نزل حاجة جديدة ولا لسة
الواحد نفسه بتهفه على شوية رعب من بتوع ماوراء الطبيعة
وقال يقولك الضرايب مصلحتك اولا قال، الاعلانات دى رفعتلى ضغط دمى
المفروض يقولوا الضرايب مصلحة الحكومة اولا، مستشفيات ومدارس قال
ماحنا طول عمرنا قاعدين لا شفنا مدارس ولا مستشفيات
تلوث تلاقى سرطان تلاقى زيادة اسعار تلاقى سحابة سواد ماشى عبارات غرقانة وماله وزرا حرامية مايضرش
انما مدارس ومستشفيات اهو ده اللى ماشفتوش
خلاص مابقيش فى لا دم ولا ذوق ولا اخلاق ولا حاجة خالص
يلا، ليه تشغل بااالك مين يرحم حااالك
يووووه انا دماغى وجعتنى من التفكير
فكرة انا بكرة هاكتب بوست عن الافكار دى
واسميه سقف الغرفة
ايوة وهاقول فيه
مستلقيا على الفراش احدق فى سقف الغرفة
...................
...................

هناك ١٠ تعليقات:

AUTISM يقول...

ايه الحاجات الحلوة دي
انا ملاحظة ان مستواك اتقدم من يوم ما انضميت للمدونة
وبعدين مالك انت والملك فاروق بتنبش في التاريخ ليه علي راي أمل
علي فكرة انا باحب اعلانات الضرايب جدااااا
تحب افوترك ولا اظبطك
تصبح علي خير

غير معرف يقول...

مدونة جميلة جدا فت عليها بالصدفة . ودمك عسل كمان .
http://khlood.modawanati.com/

Ehab يقول...

فعلا مستوايا تقدم من ساعة انضمامك للمدونة مقدرش انكر وبعدين هو انا نبشت ولا جيت جنبه انا بتكلم عالمسلسل سعادتك ولوسمحت ياريت تظبطينى وبلاش فواتير وبلاش امل كمان عشان انا بخاف
خلود شكرا على مرورك والله يعسلك

سندباد يقول...

هههههههههههههههههههههههههههههههههههه
مش ممكن ياصديقي شوية فضفضة تحفة انا عايز اعملك كتاب واسميه عبقرية كاسبر كل يوم بتبهرني والله ياصديقي
بس انا ملاحظ انك شايل هم البلد والبلد همها ما يتلم ياعم خاف علي صحتك
وسلملي علي الواد اللي بيبرطم هو مش اقرب يمشي علشان ترجع زي زمان

ســـــــمــــكة يقول...

لا بجد تدوينة تحفة!!!!!بس ياريت متطولش العملية عشان متقلبش ارق لحد الفجر
جميلة فعلا

غير معرف يقول...

البداية روعه وتدرج المستوي حتي النهايه

جميلة

Ehab يقول...

سندباد باشا شكرا دايما كدة بتحرجنى
سمكة هى قلبت لحد الفجر فعلا
جميلة شكرا على تعليقك

Tesla يقول...

أول مره أشوف بوست كده
جاااااااامد
:D:D !!!

Ehab يقول...

تسلا شكرا على المجاملة الرقيقة

Osama يقول...

great blog keep on