الأحد، يناير ٠٣، ٢٠١٠

حالة حمار

سيداتى آنساتى سادتى

ندعوكم اليوم لمشاهدة برنامجكم الأسبوعى المفضل على الفضائية المصرية حالة حمار (ياريت تخلوه على القنوات المحلية بس وبلاش فضايح)

حمار اليوم وزير خارجيتنا الهمام السيد أحمد أبو الغائط

وتذكروا دائما أن الحوار والحوار فقط هو طريقنا لتفسير كل شئ غلط بتعمله الحكومة وفى الحقيقة الحكومة مش بتعمل حاجة غلط إنما احنا اللى ولاد كلب مش فاهمين السياسات الحكيمة

- سيدى الوزير تقول ايه عن دور مصر المحورى فى المنطقة وخصوصا ان احنا حضارة سبع تلاف سنة واحنا اسياد المنطقة والباقى ولاد كلب جزم وخصوصا حماس وحزب الله وايران؟

- احنا بندير الحوار بين الفصايل الفلسطينية بقالنا كذا سنة بس فى فصايل ليها اجندة اقليمية زى حماس وحزب الله لكن دور مصر زى ما هو واحنا جامدين اوى ومحدش بيضغط علينا (قال يعنى حماس وحزب الله ليهم اجندة خارجية ومضغوط عليهم ومصر لا)

- سيدى الوزير ايه اللى حصل مع الجزائر؟

- احنا ناصحين اوى وكنا عارفين كل حاجة بس سيبنا الناس تنضرب فى السودان لأن الضرب نص الجدعنة وبعدين محدش مات وده المهم، وواحد بيقول انه بيتصل بالسفير بس مكانش بيرد عليه، طبيعى ما يردش عليه لأنه مش فاضى كان بيدير الأزمة (آه الصراحة أدار الأزمة جدا، واد مدير الصراحة)

- سيدى الوزير ايه بقى حكاية المفاجأة اللى انت محضرهالنا بمناسبة السنة الجديدة؟

يبتسم الوزير فى فخر وينجعص أوى

- الاتنين الأطباء اللى كان محكوم عليهم فى السعودية راجعين النهاردة

ويضج الاستديو بتصفيق السادة الحمير اللى واخدين فلوس عشان يحضروا الحلقة، الظاهر كدة جايبينهم من شباب الحزب الوطنى بس سيادته مقالش هما الطبيبين المصريين رجعوا بعد ما تجلدوا ولا ايه؟

ثم يعلن المحاور القدير عن فاصل

بعد الفاصل يهب المحاور واقفا

اهلا بكم مرة أخرى فى برنامجكم المفضل حالة حمار وتذكروا أن الحوار هو طريقنا الوحيد لفهم سياسات الحكومة اللى احنا مش فاهمينها عشان احنا مش بنفهم

- سيدى الوزير وايه رأيك فى الجدار العازل ؟

- ده شأن داخلى ومصر من حقها تبنى اللى هى عايزاه زى فرعون موسى لما بنى الصرح، حد قاله ماتبنيش؟ الراجل حر فى فلوسه وهو حر يبنى اللى هو عايزه، يعنى انا مثلا عندى حتة أرض فى مارينا على البحر هابنيها خرابة تجنن، ايه بقى اللى مزعل اهل غزة فى الموضوع ده؟ الموضوع مش هزار ده الأمن القومى المصرى يا بهايم (ده عار يا بهايم ده انا مكسوف انى مصرى)

فيصفق السادة الحمير تصفيق حاد بعد أن يشير لهم ضباط أمن الدولة خلف الكاميرات بأن وقت التصفيق الحاد قد حان

يقف الأخ المحاور اللى ماعرفش اسمه تانى ليفتح باب الأسئلة المكتوبة من قبل ضباط أمن الدولة الغاية فى الذكاء

يقف واحد حمار بزيادة شوية ويفضل يشتم فى حماس نص ساعة ويدعى أنها على علاقة بإيران والقاعدة والجيش الايرلندى كمان لو حبيت يا باشا، مش عارف فين السؤال

وبعد عدة أسئلة من هذا النوع الخطير يختتم المحاور اللى لسة مش عارف اسمه مع انه باين عليه راجل مهم اوى فى الحزب الوثنى الحلقة وانتظرونا فى الحلقة القادمة مع حمار آخر من الحكومة أو الحزب الوثنى

ليست هناك تعليقات: