فى العالم كله نائب البرلمان يراقب أداء الحكومة ويحاسبها، ينتقدها إذا أخطأت ويثنى عليها إذا أحسنت
أما فى مصر فالنائب له استخدامات عدة إلا الاستخدام الأمثل الذى ذكرناه آنفا (حلوة آنفا دى)
بالنسبة للنائب فقليل منهم يفكر فى مصلحة مصر واللى بيفكر فى مصلحة مصر منهم مش بيستمر لأن الحكومة مش بتسيبه، الباقى بقى مش عايز الكرسى إلا عشان يستخدم الحصانة لزيادة أمواله إما عن طريق الإتجار فى بضائع يعاقب عليها القانون أو تقاضى أموال مقابل الحصول لأهل الدايرة على تأشيرات من الوزراء لدخول الحربية أو الشرطة أو النيابة أو أى وظيفة حكومية، وربما يسعى النائب لعضوية المجلس من أجل طموحه السياسى مثلا وفى هذه الحالة سيسعى جاهدا لكى يكون مرشحا للحزب الحاكم حتى لو كان حزبا دكتاتوريا ماصا لدماء الشعب فيكون أعمى وأطرش وموافق دائما
أما الناس فى مصر فمع الأسف ينظرون للنائب على انه يجب أن يلبى مطالبهم الشخصية الهايفة، يعنى مثلا زى ما قلنا قبل كدة تأشيرت من الوزرا عشان الحربية أو الشرطة والنيابة والبترول
لو حد شاف فيلم طيور الظلام بتاع عادل امام فى أى قناة خاصة زى روتانا مثلا هايلاحظ ان فى مشهد مقطوع فى التليفزيون المصرى بيتكلم على نواب البرلمان فى مصر، المشهد بيقول أن الوزرا فى مصر دايما ليهم شوية نواب تبعهم بيمضولهم على التأشيرات دى وفى مقابل ده طبعا النواب دول بيدافعوا عن الوزرا لو حد فتح بقه معاهم، وبكدة يضيع دور نائب الشعب تماما لأنه بيبقى شغال عند الوزير اللى هو المفروض يراقب أداءه ويحاسبه
الحكومة بقى شايفة ان النواب دول واجهة اجتماعية وشماعة من حديد تشيل عنهم أى حاجة، يعنى لو حد قال للحكومة بم تقوله انت مين وبتتكلم ليه؟ نواب الشعب موافقين، والحقيقة ان الناس نصهم مايعرفش ومش بينتخب والباقيين قانعين بتأشيرات الشرطة والحربية عشان ابنهم يطلع ياخدلهم حقهم ويقول الجملة الشهيرة " انت ماتعرفش انا مين؟"
وبكدة طبعا يبقى النائب فى مصر المحروسة هو نايبة الشعب وليس نائبه
نيجى بقى لموضوع الالتزام الحزبى اللى ناس كتيرة فى مصر ومن الشباب ماتعرفوش، لو انت شاب وقررت فجأة لا حول الله انك تنتخب نائب للدايرة اللى انت فيها، هاتنتخب على أى أساس؟
ناس كتير بتنتخب قرايبها، يعنى مثلا عمه أو والده نازل الانتخابات يقوم ينتخبه ويقف معاه كمان من غير ما يعرف الراجل ده تبع حزب ايه وبرنامج حزبه ايه؟
أنا عن نفسى مستغرب جدا ان الحزب الوطنى فيه شباب، طيب انا عايز اسأل أى شاب من شباب الحزب الوطنى هو ايه برنامج الحزب الوطنى؟ ولو عارف البرنامج وقراه قبل كدة هل الحزب الوطنى بينفذ البرنامج ده فعلا ولا هو كلام وخلاص؟ الحقيقة ان الشباب دول فى منتهى الذكاء وواضح انهم عرفوا طريقهم من بدرى وبيحاولوا يلعبوها صح، يمكن عشان كدة الحزب الوطنى بيقول عليهم شباب واعى وحاسب حساباته ومحدد اولوياته
لازم نعرف ان أى حد بينزل تبع حزب معين فهو ملتزم ببرنامج الحزب ده وسياسته ومعتقداته السياسية، ولو هو مستقل لازم نعرف برنامجه ايه واتجاهه السياسى ايه؟
فى النهاية أعتقد أننا يجب أن نتخلى قليلا عن أحلامنا الشخصية وطموحاتنا السياسية من أجل هذا الوطن الذى أرهقته أنانيتنا وعدم التفكير فى الصالح العام بقدر تفكيرنا فى مصلحتنا الشخصية
وطبعا كل الكلام ده مالوش لزوم ومفيش فايدة
ليست هناك تعليقات:
إرسال تعليق