لأول مرة منذ بدأت التدوين هاتكلم عن نفسى
أنا بكيت يوم الجمعة اللى فاتت
ايوة هو ده اللى حصل
صعب على الواحد انه يعترف بحاجة زى كدة وخصوصا أنا اللى الناس كلها بتقول عليه جامد ومعندوش قلب ومابيهموش حاجة وتقريبا كدة يعنى ماعندوش دم
انا فى حياتى كلها ماعيطتش كتير هما كام مرة
مرة لما الشيخ أحمد ياسين مات الله يرحمه ومرة لما صالح سليم مات ومرة لما شارون دخل المسجد الأقصى ويوم الجمعة آخر مرة لما شفت الشرطة الاسرائيلية داخلة المسجد الأقصى
شعور بالغضب والعجز وقلة الحيلة وفى لحظة لقيت دموعى نازلة زى السيل
ياترى لما ربنا يسألنى عملت ايه هارد اقول ايه؟
يارب انت عارف أنا مفيش فى ايدى حاجة، كل اللى اقدر عليه انى اكتب واتكلم لغاية ماقربت اتجنن
ثانية واحدة
اللى حصل ده ماحصلش من فراغ انا السبب ايوة انا السبب، الامام على كان بيقول الايمان يزيد وينقص وانا ايمانى نقص كتير
كل صلاة بأخرها عن معادها أو بتفوت منى سبب فى اللى حصل
كل كدبة أو شتيمة أو نميمة
كل نظرة وكل لفتة غلط سبب فى اللى حصل وبيحصل للمسلمين
انا الغلطان
ومن يوم الجمعة قررت ان انا ابدأ طريقى إلى الله من تانى
الطريق اللى مشيته كتير وكل مامشى اكتر احس ان لسة قدامى كتير
يارب خد بايدى
هناك تعليقان (٢):
انا تعبت من كتر ما اعمل sing in ومش عارف بعدين رد عليا باسمي عشان اعرف انك بترد عليا
كل اللي انت حسيت بيه حصل معايا ونفس الناس اللي بكيت عليهم بردو عملت زيك
وحتى احساسي بكسوفي من ربنا واختبار الاقصى اللي يارب مانخسروش زي اللي قبله واللي قبله
وبعدين أولمرت قال انه هتدخل عشان خناق فتح وحماس مش عاجبه
وامبارح اتحفني بأنه متشائم بشأن حكومة الوحدة الوطنية
يا أستاذ كاسبر
كفايا علينا المذيعة الفلانية اللي مش عارف ايه وفلان هرب
والادي ان فيه نايب وطني النهاردة عايز يحبس اي طالب اهله اخوانيين
شكلاا واسف للاطالة
وانت وأ\محمد ممتاز واحد
انتو رجالة واعملو اعلان عن المدونة في موقع filbalad
وانا هاساعدكم على ان الشباب في الموقع تعرفكم
واعلاناته رخيصة من 100 جنيه طالع
شكرا ياشباب
استاذ زيزو انا متشكر جدا على تعليقاتك واهتمامك واقتراحاتك وانا مفروس معاك من زمان مش من دلوقتى
ربنا يرحمنا ويعفى عنا وياريت ماتقطعش الزيارة :) زيارتك وتعليقاتك فعلا بتسعدنى
شكرا مرة تانية
إرسال تعليق