خواطر

وخواطر ياخوانا ليست الست خواطر جارتنا وإنما هى جمع خاطرة بمعنى أفكار

واحد غلس هايسألنى ومقلتش أفكار ليه من الاول وريحت دماغنا؟ اقوله عشان الاخ سندباد صاحبنا مايحاكمناش بتهمة التعدى على الملكية الفكرية وسرقة اسم المدونة بتاعته وتبقى شغلانة وبعدين لازم الواحد يتفلسف شوية ويبين انه يعرف شوية عربى والكلام ده يعنى وبلاش الأسئلة السخيفة اللى مالهاش لازمة دى

ما علينا

المهم ان انا جاتلى كذا خاطرة أو فكرة فى دماغى وحبيت اقولها

الخاطرة الأولى

كنت أجلس مع أخ أكبر لى وهو ممن أحترمهم واحترم أرائهم وسألنى انت مدون تتبع أى فصيل سياسى؟

جاوبت بأنى لا اتبع أى فصيل أنا فقط معارض للنظام الحالى

قاللى كونك معارض وكفى ده ينفى عنك صفة الموضوعية والحياد لأن لو النظام عمل حاجة صح هاتقول عليها غلط ولو عمل حاجة غلط هاتقول عليها غلط كبير جدا

الصراحة الكلام ده عمره ما خطر على بالى وهو كلام له وزنه ووجهة نظر تحترم

وده خلانى أفكر فى حاجة تانى

مشكلتنا الحالية اننا مابنسمعش

دوشة غير عادية والكل بيتكلم مع ان ربنا خلقلنا ودنين اتنين ولسان واحد واعتقد ان الحكمة من كدة هو اننا المفروض نسمع اكتر ما نتكلم

اعتقد أن هذا هو نتيجة مباشرة لغياب ثقافة الاختلاف مش فى مصر بس فى العالم كله

الخاطرة الثانية

بسم الله الرحمن الرحيم

سيهزم الجمع ويولون الدبر

كنت أردد هذه الآية وروسيا تحاصر جروزنى، وأمريكا تجمع العالم حول افغانستان والعراق، واسرائيل تحاصر لبنان، واثيوبيا تعد العدة لدخول الصومال لإسقاط نظام المحاكم الاسلامية

وفى كل مرة كان إيمانى يهتز بشدة فالهزائم تتوالى

الآن وأنا اسمع هزائم قوات حلف الناتو فى افغانستان ومأزق القوات الأمريكية فى العراق وما حدث لإسرائيل فى لبنان وأنباء عودة المحاكم والاضطرابات فى الصومال تتردد هذه الآية بشدة فى عقلى من جديد

لم تكن الهزائم سوى اختبارات ليمحص الله ما فى قلوبنا وأعتقد أن معظمنا فشل فى الاختبار فشلا ذريعا وعلينا الآن أن ننتظر كارثة الاستبدال أو نضرع إلى الله أن يعطينا فرصة أخرى ويستعملنا ولا يستبدلنا

الخاطرة الثالثة

مع كثرة سفرياتى هذه الأيام إلى القاهرة شبهنى أحد أصدقائى الغلباويين أننى صرت اشبه الرحالة ابن بطوطة أو أحد المحدثين الذين كانوا يجوبون الأصقاع والبلاد البعيدة من أجل طلب العلم

وقد لاحظت فى أسيوط ميزة لم أجدها فى أى مكان آخر وهى أنك بمجرد وصولك إلى المحطة ونزولك من القطار يجتمع سائقى التاكسى جميعا فى نداء واحد مقدس كأنه كورال جماعى نشاز قائلين تاكسى أى بلد وأى بلد تاكس

جملة مستفزة بالفعل ولكن عندما سألت أحد سائقى التاكسى عنها قال لى أن هذه أحد وسائل الترحيب بالضيوف

والله يمكن ليه لأ