الأحد، سبتمبر ٢٧، ٢٠٠٩

مواطن مصري أعزب عاطل ذكر - يحدث فى مصر الآن

يحدث في مصر الان



سامحوني علي الدخلة الشمال اللي في المقدمة وعلي شوية اللغة العربية دول كانوا لازم يكونوا بالفصحي علشان يبان التحذير صارم ولاينخدع أحد ويدفع فيه فلوس

شندوشت طعمية او حتة بسطة اولي بالفلوس

بس المشكلة مش في كدة المشكلة ان الكتاب ده موجه لاربعين في المية من سكان مصر اللي هم احصائيا نسبة البطالة في البلد ولو حطينا عليهم البطالة المقنعة في الشركات والمصالح والناس اللي بتمثل انها عايشة او شغالة يبقي النسبة هاترتفع لسبعين في المية ولو حطينا عليهم الاميين والمهمشين واحسب عندك نسبة خطا-اكيد حصلت في تعداد السكان- نبقي90 مش 80 مليون ويبقي كدة تقريبا كلامي موجه لستين مليون- الرقم ده مع الرأفة- بس الفكرة ان كل دول اخر حاجة في اهتمامهم القراية ده لو كانوا بيعرفوا يفكوا الخط اصلا وده مش سخرية من الجهلة والاميين في بلدنا عمر ده ما كان عيب العيب علي اللي اتعلمو وعاملين ان معاهم شهايد وهم أميين وعالة علي البلد من حملة الدبلونات واسانسات الحكوك وباكابورتات التجارة اللي بيشكلوا ولا فخر نسبة من طاقة البطالة المتفجرة في وادي النيل

ولا نقول احسن نسبة من لا طاقة العمل

مش عارف هي ليها كذا تصنيف كلهم اوحش من بعض وقبل حد ما يهاجمني انا واحد من حملة تلك الشهادات العدمانة، انا معترف بالذنب ده ومش بعلق شماعة الغلط علي اي حد في اسرتي او حتي الحكومة بس مش معني كدة اني اتحول بسبب تلك الغلطة التي حدثت من 18 سنة تقريبا وهو تاريخ حصولي علي مجموعي السكرة 68%، اتحول الي متسول يبحث عن وظيفة اوعاطل

وبكدة يبقي وصلنا لاول خانة في بطاقة الرقم القومي بتاعتي اللي بعتبرها فعلا ملخص لحياة اي مواطن مصري عادي مش بس مجرد اثبات للبيانات وتحقيق الشخصية فالامر سيان، دلوقتي انك تكتب لا يعمل وانك تكتب حاصل علي مؤهل عالي خصوصا لو كنت من خريج كليات المجاري او مجموعة التخلف العقلي (حقوق/تجارة/اداب) ويمكن تنضم لينا دلوقتي كليات كانت في القمة لوقت قريب بس الزمان مال عليها زي علوم مثلا او حتي اكاديمية الملاحة في اسكندرية بعد ما سوق القباطنة رطرط

طبعا بعد حصولك علي المؤهل الخرافي ده ويا سلام لو كان تقديرك مقبول و معاه مادتين كادوه من الدكاترة فرصة حصولك علي شغل تعادل فرصة حصول مصر علي كاس العالم 2050

والنتيجة النهائية يا سادة هي انضمامك لاكبر تجمع من البدل والكرافتات في الشرق الاوسط انا مش عارف ليه الواحد مننا يا جماعة يا عواطلية مفكرشي يخترع يونيفورم زي الزعبوط او البرباتوظ بتاع البيبيهات للمحامين يتلبس كدة بسوستة من ورا تخلي الحاجب بتاع المحكمة يقيفهولك تكون الكرافتة بتاعته منه فيه لايقة علي حسب لون البدلة اللي بقت زي البردعة وفقدت هيبتها من ساعة ما بقي المحامين نسبة من سكان اي قرية ونجع في مصر

انا متهيالي لو وقفنا جمب بعض-انا محامي استئناف بالمناسبة ولا افقه شئ في القانون-وشبكنا ايدينا حنطوق الكرة الارضية ويمكن كذا مرة

احنا كدة بالصلاة علي النبي حاجة بتاعة 300 الف ويمكن نوصل نص مليون يعني مش عاوزين مقارنات ولا احصائيات كتير

احنا نساوي

  1. سكان الكويت تقريبا
  2. عدد سكان قطر بالمستريح
  3. ويمكن عشراضعاف مساجين مصر

ورغم كدة افقر واهيف نقابة احنا ونقابة التجاريين اخواتنا في البكبورتية

نيجي للنقطة التانية او التالتة انا علي فكرة لا مرتب الكلام ده ولا مبيضه ولا حتي راجعته اللي في دماغي بقوله- النقطة التالية هي انا مصري

مكدبشي عليكم انا فعلا بحب البلد دي وما زلت رغم ان مفيش اسباب حقيقية لكدة او علشان شربت من نيلها ومشيت في مجاريها

نفسي اعرف شيرين اللي غنت الغنوة الجميلة دي راحت ليه تولد في امريكا؟ علشان الولد او البنت ياخد الجنسية الامريكانية ويمشي في مانهاتن ويكره بن لادن؟

________________________________________________

وإلى اللقاء فى الحلقة القادمة

ليست هناك تعليقات: