ازدواجية تفلق
تلاقي اكتر ناس تتكلم عن حب مصر وريادتها الفنية والثقافية ومش عارف ابصر ايه هما الجماعة الفنانين دول اللي هما تقريبا مش عايشين في البلد او قاعدين فيها اصلا
حاجة كدة زي العيان اللي بيغني لميت
نيلها ايه يا بت الناس قصدك نيلتها وقمامتها وشوارع ايه دي اللي ما ممشتشي فيها
هو انا ورايا غير المشي فيها والتدوير عن شغل او الهروب من واقع البيوت المؤلم والاليم
بس بيني وبينكم الغنوة حلوة لكن ماليهاش اي علاقة بحب او كره البلد فعلا مصر حالة متفردة بين الاوطان يعني حبنا ليها وانتمائنا حقيقي
مش مواطنة ولا المساواة ولا الهجايص دي هي فعلا تتحب كدة بعبلها زي ما تحب امك او ابوك ايا كان شكلهم ومستواهم
28 - 09 - 1974
ده تاريخ ميلادي، انا ولا فخرمن مواليد هذه السنة الغريبة يعني بالصلاة علي النبي اللي من دوري كدة دلوقتي عندهم 35 سنة-لسة صغير صح- لا طبعا مش حضحك علي نفسي
احلي سنين الواحد راحت اونطة لا اتعلم حاجة ولا عمل حاجة في حياته واللي مصبرني علي كدة اني اكتشفت (علي فكرة حتقروا كلمة اكتشفت دي مليون مرة في الكتاب العبيط ده لدرجة بتخليني افكر اعمل كتاب مخصوص عن الحاجات العبقرية اللي انا اكتشفتها) ان مواليد1974معظمهم بلا استثناء عانوا من سوء الحظ او ضياع الفرص ده يمكن ينسحب علي مواليد السبعينات بصفة عامة
يعني لا احنا حصلنا مواليد الستينات وفرصهم في التعليم الاحسن والوظايف الافضل ولا مواليد التمانينات اللى طلعوا روشين وفاهمين الليلة صح من اولها ومضيعوش وقت
يعني مواليد السبعينات طلعوا بس ملحقوش يطلعوا او طلعوا وحد قفل الباب عليهم وهم برة وطلعلهم لا مؤاخذة بت.... لسانه
ليه بقي بقول الكلام ده
معظم اللي حواليا من جيل البسكوت البيمبو وفوازير فطوطة وكارتون سندباد وورق الجلاد الاصفر وقزايز الريحة السكريه ام تلاتة وربع هدية عيد الام الاجبارية واسكوبيدو وترابيزات البنج ولعب الاتاري والعجلة ام فتيس سرعات ولعبة الليدو اللي انقرضت مع مشرق شمس 1990
معظم دول محطمين نفسيا واشباه رجال
انا مقدرش احكم علي البنات من جيلي لاني للاسف معرفش بنات وده يمكن جزء من مكملات شخصية 1974ويمكن يكون ده اوبشن نزل مع الموديل بتاعنا انه يكون اغا، طبعا اللفظ العامي كلنا عارفينه مفيش داعي نقبح ونصرح بيه يمكن انسات او مدامات تتهبش في عقلها وتقرا الهبل ده
حتي اللي اتهئ ليهم انهم نجحوا مننا واتجوزوا يا اما طلقوا والقايمة جابتهم علي الحديدة او زهقانين من عيشتهم وهربانين من البيوت علاطول طايرين ورا البنات اللي مستوي جمالهم ارتفع بشكل مش طبيعي من اول مواليد 1985 وانت طالع، حاجة مالهاش تفسير لا جينيا ولا بيئيا
المفروض ان التلوث زاد في المية والهوا والاكل ده غير ان امهات البنات دول زي ما يكونوا متبنيينهم او خاطفنيهم مش شبهم خالص
هو بصراحة فيه شئ من الشبه تلاقيه بين الام والبنت بس مش اكتر من العلاقة الشكلية بين الغزالة والجاموسة الاتنين طبعا ثدييات وحط تحت ثدييات دي ميت خط
طبعا عيال كتير مننا انتحرت او اختفت في ظروف غامضة حتي اللي سافر وقلنا انه نفد رجع تاني
ورجع تاني يسمع الاعادة بتاعة رأفت الهجان الجزء الاول حلقة الخواجة صروف علي القناة السابعة مع ان المسلسل كله عنده علي الكومبيوتر وبيتعاد علي الفضائيات كل شوية بس هي النفس اللي وحشة وبنحن لايام التمانينات الذهبية
بصراحة انا مش عارف ذهبية علي ايه بس تعالوا نحبها من منطق مختلف صحيح كانت الهدوم شكلها يضحك وموضات الشعر زي تسريحة الديك والمناطيل المنفاخ ورقصة الانسان الالي السخيفة اللي بدع فيها مايكل جاكسون لدرجة الغلاسة
وكانت واحدة زي نادية الجندي دي توقف اتخنها شنب واللي معاه عربية 405 بيجو يبقي باشا يعني من وجهة نظر الشباب السيس بتوع اليومين دول ايام فقر وسودة بس اللي عاش طفولته اياميها مش حيقول كدة ويمكن هم حاسين بالكلام ده قوي
وعلي فكرة احصائيا وده كلام الحكومة وتقارير المنظمات الدولية ان سنة1985 تعتبر ذروة النشاط الاقتصادي لدول الخليج والمنطقة العربية واللي منها
نظرة واحدة علي جرنان او مجلة ساعتها حتي لو معارضة تعرف الدنيا كانت عنب قد ايه
اوحش حاجة كانت الكوارث العالمية الطبيعية، زلزال وتلاقيه في قلب المحيط وغرق كام سمكة ولو كارثة مش طبيعية حتبقي اختطاف طيارة وطلب فدية300 الف جنيه يعني شقة في المعلمين دلوقتي (منطقة فى أسيوط بس محدوفة شوية والتاكسيات مش بترضى تروحها)
واللي يتزنق ولا يضيق بيه الحال قوي6 شهور في العراق يشتغل اي حاجة ويرجع صحته رادة ومعاه مية متين دولار، فين العراق دلوقتي والله العظيم احنا انضرينا اكتر منهم ياخي قول هم بقوا لاجيئين ولقيوا دول تؤيهم
________________________________________________
وإلى اللقاء فى الحلقة القادمة
ليست هناك تعليقات:
إرسال تعليق