الأربعاء، سبتمبر ٠٥، ٢٠٠٧

ليلة تليفزيونية


اول امبارح كانت ليلة تليفزيونية ممتعة جدا أصابتنى بتلبك معوى من النوع الثقيل
اسمحولى تشاركونى المرح

شعبى الحبيب انا ابن مجنوناااااااااااااا

بداية السهرة كانت مع الجزيرة واخبار غلاء الأسعار فى مصر
مازالت الحكومة المصرية ترفع فى أسعار السلع والخدمات الرئيسية مع بداية دخول موسم رمضان والأعياد والعام الدراسى زيادة فى أعباء الشعب المصرى الغلبان وإمعانا فى تعنت الحكومة الواضح وقراراتها المتوالية العجيبة
كل من حولى كان يشاهد التليفزيون بمنتهى الكآبة بينما اصابتنى نوبة ضحك متواصل عندما تذكرت محمد صبحى وهو يقول شعبى الحبيب انا ابن مجنوناااااااااااااااااا
صحيح هم يبكى وهم يضحك


قطة تصارع النمور

اقلب القنوات
دريم وبرنامج العاشرة مساءا
منى الشاذلى تقول انها حلقة من نوع خاص تلتقى فيها بالسادة اللواءات من وزارة الداخلية لمناقشة الانتهاكات الأخيرة من قبل رجال الشرطة فى حق الشعب المصرى
بالطبع السادة اللواءات أظهروا منتهى البراءة وهم يتحدثون عن أن هذه الانتهاكات مجرد استثناءات وانها تقابل بمنتهى الشدة والحزم وانه لا توجد مشكلة من اساسه
المشكلة أنهم لا يستطيعون أن يعترفوا بوجود مشكلة فى ثقافة رجل الشرطة بوجه عام وأن المشكلة الحقيقية تكمن فى العملية التعليمية داخل كلية الشرطة
أقول هذا لأننى تكلمت مع الكثير من رجال الشرطة وكان كلامهم كله تقريبا واحد والعجيب انه بنفس المصطلحات زى مثلا: دى قلة مندسة، انت مين يابنى قعد معاك وضحك عليك وحفظك الكلمتين دول، زى مايكون يعنى انا مانفعش اقول كلام من نفسى لازم يكون فى حد بيضحك عليا وشوية وهايقوللى مين بيمولك من الخارج
حاولت كثيرا أن اتخيل اسماء المواد والمناهج فى كلية الشرطة، ممكن مثلا تكون فى مادة اسمها مادة الغتاتة ومادة كيف تقل اصلك وترازى فى خلق الله ومادة ارفع رأسك فأنت ضابط شرطة ومادة ضابط الشرطة دائما على حق ومادة المواطن المصرى مدان وابن كلب وواطى حتى لو ثبتت براءته
ممممممم اعتقد انها مناهج ممتازة
الصراحة الناس اللى بعتت رسائل واللى اتكلمت فى التليفون فى البرنامج مقصرتش وأكثر تعليق عجبنى كانت الرسالة اللى واحد بعتها وقال فيها: نقاش غير متكافئ، قطة تصارع النمور
يالها من قطة ويالها من نمور


يادى الحجاب

اقلب القنوات واتوقف عند القاهرة اليوم برنامج عمرو أديب الشهير
البرنامج يستضيف الكاتب جلال امين ليتحدث عن كتابه الجديد الذى يتحدث فيه عن سيرته الذاتية
الكاتب جلال امين تحدث عن مصر والمصريين وتحدث عن الحجاب على أنه ظاهرة اجتماعية ومظهر من مظاهر تحرر المرأة ارتبط بخروج المرأة للعمل
واحدة اتصلت واعترضت على هذا الكلام قائلة أن الحجاب مظهر من مظاهر التخلف
الصراحة انا مش عارف ايه اللى دخل الحجاب فى موضوع التحرر والتخلف ده، هل لو واحدة لابسة حجاب تبقى غبية وحمارة؟
العلمانيين المتشددين فى مصر يتخذون من الحجاب معركة حياة او موت لست أدرى لماذا؟ وبما انهم فى غاية الثقافة ومثقفين اكتر منى طبعا حد فيهم يقوللى ايه اللى هاتستفيدوا مصر والمصريين لو عملنا زى تونس وفرنسا ومنعنا الحجاب فى المدارس والهيئات العامة مثلا؟ هل ستصبح مصر دولة متقدمة من دول العالم الأول؟ هل سينمو الاقتصاد المصرى؟ هل سنصحو فى الصباح لنجد مصر خالية من الفقراء؟
يا جماعة جاوبوا واحد جاهل وحمار زيى
بالمناسبة انا جبت معايا المايوه بتاعى عشان اعوم فى بحور علم العلمانيين يمكن استفيد

هناك ٥ تعليقات:

Hook يقول...

أجيب المايوه بتاعي يا عمو كاسبر؟

Casper يقول...

اديها الدنيا صيف والواحد عايز ياخدله غطسين قبل رمضان

Tesla يقول...

هههههه
بوست جامد يا ريس كاسبر
عندك حق يا عم, دول كلهم عالم ولاد وسخه

sendbad يقول...

الحكومة والشرطة والعلمانين
سؤال برئ بعد كل اللي شفته وشمعته
انتي لسه عايش يابني
انت فكرتني بالموجه اللي قل محمد صبحي في مصرحية الهمجي لما دخله الفصل
وانت قادر تعيش ازاي يابني
عليه العوض ومنه العوض

Casper يقول...

والله با باشا ادينى بحاول هاعمل ايه يعنى هانتحر؟