الثلاثاء، سبتمبر ١٨، ٢٠٠٧

الحزب الوثنى الديموقراطى


الحزب الوثنى الديموقراطى
دايما عالى عالى مقامه
لكن سلوكه دايما واطى

الحزب الوثنى عديم الذوق
يلعب تملى فى الصندوق
بيسجنى وأنا المسروق
وإن قلت لأ أبات مشنوق
أو أعيش وأنا حالق شنباتى

الحزب الوثنى الديموقراطى

الحزب الوثنى كلام فى كلام
مشروعه عبادة الأصنام
متعهد حفلات حكام
ويسوقنا زى الأغنام
وريحته أسوأ من شراباتى

الحزب الوثنى الديموقراطى

الحزب الوثنى فى كل مكان
من مراكش لباكستان
وعنيه فى كفاية والاخوان
مرة دخلت البيت نعسان
لقيته قاعد ويا مراتى

الحزب الوثنى الديموقراطى

الحزب الوثنى قليل الدين
محتلنا زى فلسطين
خلى عشيتنا زى الطين
وجنوده داخلين حطين
ساعة ما يواجهوا مظاهراتى

الحزب الوثنى الديموقراطى

الحزب الوثنى جمال وهلال
يكسب برجال الأعمال
نحاوره يدخل فينا شمال
وسرقة الصوت عنده حلال
من أحيائى ومن أمواتى

الحزب الوثنى الديموقراطى
دايما عالى عالى مقامه
لكن سلوكه دايما واطى




شعر عبدالرحمن يوسف

لمن يريد أن يسمعها مغناة بصوت وألحان الشاعر نفسه يمكنه تنزيلها من هذا الرابط

وأى خدمة

هناك ٧ تعليقات:

سندباد يقول...

رمضان كريم ياعم كاسبر خف شوية علشان تقضي باقي رمضان في البيت
بس بيني وبينك ملعوبة

AUTISM يقول...

كاسبر
رائع كعادتك
طبعا الحزب ده في جمهورية هبلستان

Ehab يقول...

سندباد باشا انا قاصد انت عارف البيت زحمة اليومين دول
حتشبسوت والله انتى ادرى بجمهورية هبلستان انا عرفتها من سعادتك
:)

غير معرف يقول...

أفتكرتك أنت اللى كتابها قلت أيه التقدم ده ... مش بطاله معبره

تحياتى

غير معرف يقول...

أختيار موفق يا كاسبر يا عسل انت

غير معرف يقول...

عبد الرحمن يوسف
شاعر مصري من مواليد بدايه السبعينات من دواوينه

نزف الحروف
امام المرأة
في صحة الوطن
لا شئ عندي اخسره
على المكشوف
اكتب تاريخ المستقبل




يعيبه التمسك بالقالب الشعري القديم



ولكن كل ما قرأت له كان بالفصحي فهل هو نفس الشاعر ام غيره

Ehab يقول...

عزيزتى أمل انا لايمكن اتقدم واخيب ظتك المهم عايزين نكمل حكاية جعفر ودلال عشان استفيد انتى عارفة ان انا غر ساذج وعايز يتنصح
توتى شكرا باشا الله يعسلك
جو شكرا على المعلومات وهو فعلا الشاعر عبدالرحمن يوسف ولو دخلت موقعه هاتلاقيله حاجات بالفصحى والعامية لكنه فعلا زى مانت قولت اغلب شعره بالفصحى