مواطن مصري أعزب عاطل ذكر - مين يتبنانى؟

مين يتبناني

بعد كل ما ذكرت سالفا وطبقا لاحصائيات الجمعيات الخيرية والمساعدات الاجنبية انا وامثالي بالملايين غير مستحق او خاضع لاي شكل من اشكال الدعم او الرعاية المحلية او الاجنبية، لقد حدث معي ما يسمي رياضيا بالاستبعاد السلبي او النفي بالتجاوز

فانا راجل والحمد لله مش بنت ولاست وكدة انت تشيل شيلتك ملكشي معاش بعد ال26 ، معرفشي بتاع ايه؟ هو يعني انا لقيت شغل وما اشتغلتش؟ وكدة انت مش تبع جمعيات حقوق المراة او حتي ختان الاناث وطبعا عازب زي ما يكون ده بمزاجي فانت كدة منبوذ اجتماعيا، انا كدة في احسن حالاتي ديب مفترس يبحث عن فريسته ووغد لا يسكن مع العائلات

حوش الفحولة اللي بتخر مني

لا واللي يحرقك بقي

محروم من وظائف السلك الدبلوماسي التي تشترط وجود زوجة للتعيين، ودي بصراحة اكتر حاجة حارقاني طب افترض اختاروني دلوقتي، الحق يا تري انقي واحدة واتجوز؟

ده الواحد اغلب من الولية، حتي دول بيعرفوا يتصرفوا وبينحرفوا، يعني اعمل ايه مثلا اشذ؟ دول حتي كتروا ووقفوا سوق بعض اليومين دول

وطبعا بما اني حاصل علي مؤهل عالي بفقر اللي جابوني وهو اسانس الحكوك ابقي خارج برامج التاهيل المهني والحرفي ووظايف الحكومة الفنية اللي علي حظي بداوا في التوسع فيها مؤخرا واللي معاها بداوا في التوسع في حتة من جسمي عزيزة عليه

ولما عملت فكيك وقلت الحق معاش ليا اعتبروا انتمائي لنقابة المليون شهيد دي عمل ثابت يدر دخل شهري واتقفل الطريق قدامي للقروض والوظايف الحكومية الا اذا اتنازلت عن كارنيه المخابرات الرهيب اللي معايا اللي ما ينفعشي تحجز بيه تذكرة مترو

وبما اني برضه زي ما ذكرت بيانات بطاقتي الجميلة اني مصري وليا الفخر طبعا اتحرم علية دخول اي بلد للشغل او العلاج او حتي اللجوء السياسي لان بلدي موفرة ليه كل حاجة وهي اولي بيا، ده مش كدة وبس ده انا اصبحت عرضة لكافة القوانين والاستيقافات والتفتيشات والتقفيشات في المناطق الحساسة وغيره في اي لحظة

وهذه بالطبع متعة جنسية بالغة يحرم منها اي مواطن غير مصري بحكم ان عدم تمتعه بالجنسية المصرية لا يؤهله لذلك العبث الشهواني – وخد بالك والنبي ومن الالفاظ اللي الفها واضعي القانون

تمتعه

ده اللي كتب الكلمة دي يستاهل عليها بع... بوسة

وطبعا انا كبرت وما بقتشي طفل، يعني لا حد يتبناك ولاحد يتاويك ولا نيلة

وما انتش اقلية دينية في بلدك تتحامي في اي طايفة او تجري علي سفارة ترحلك، المفروض انك ابن البلد يا بن الش.... الشعب

يعني ذكر مع ايقاف التنفيذ

مصري مع ايقاف التفيذ

متعلم مع ايقاف التنفيذ

محامي مع ايقاف التنفيذ

متدين مع ايقاف التفيذ

ودول الخمس الحاجات اللي عرفت اوقفهم في كل حياتي حتي الان

كويس اني لقيت حاجة عرف اوقفها