الثلاثاء، أكتوبر ١٣، ٢٠٠٩

مواطن مصري أعزب عاطل ذكر - أنا المصرى كريم العنصرين


انا المصري كريم العنصرين


نيجي للبند الرابع - بند رابع ايه؟- معلشي انا توهتكم شوية واخدني الكلام عن احلي فترات حياتي ونسيت الخط الاساسي للكتاب وهو بيانات البطاقة الشخصية بتاعتي

مصري

طبعا كتير منا شاف فيلم المواطن مصري

قصة يوسف القعيد وبطولة عمر الشريف وعزت العلايلي وصفية العمري، طبعا التسمية ما جتشي من فراغ هو بيحكي عن حال معظم المصريين في اليومين دول فحب يلخص وعمم الاسقاط وسمي بطله الاساسي اللي بيضحي بيه في الاخر واللي اجاد دوره الله يرحمه عبدالله محمود بملامحه المصرية الصميمة

الفكرة ان باين والله اعلم ان مصري دي بقت جريمة اليومين دول مش بس فى بلاد برة والبلاد العربية بس، ده الجديد انك هنا في مصر علشان تعيش كويس يستحسن ما تبقاشي مصري خليك هندي مثلا - مع ان احنا هنود من زمان ومكبرين الطاسة ولافين العمة ورابطين الفيل- او خليك جيبوتي بس لو اعرف بياخدوا جنسيتها منين يعني مثلا بالزواج من جيبوتية ولا بالاقامة فترة في الاراضي الجيبوتية الشقيقة؟ مش عارف، ولا قمري من جزر القمر- بالمناسبة جزيرة منهم قد جزيرة المنيل استقلت بقرار منفرد عن باقي الدولة وطلبت الانضمام لفرنسا والعودة راضية لحظيرة الاستعمار الفرنسي، والله ناس بتفهم وفروا علي مواطنيهم قرف الفيزا والتاشيرة وتجديد الاقامات الحكومة جابتها من الاخر وانضمت بخطرها لفرنسا ومين جاور السعيد يسعد

واحنا مجاورين مين غير المجانين والاعداء والمالح، اللي يفرسك يا اخي ان اي مواطن في العالم ممكن يخش اي حتة في العالم بسهولة ما عدا المصريين

يعني خد عندك مثلا المنطقة العربية، سكان الخليج اغنيا ومرحب بيهم في اي بلد بفلوسهم يا كلاب- العراقي والسوداني والفلسطيني والصومالي واللبناني والاردني ويمكن السوري اوضاع بلادهم تجيب كدة علي لاجئيين لأسباب مختلفة منها الاحتلال أو الحروب الاهلية وغيره - قال يعني احنا الاحوال مستقرة ومش بنحارب علشان لقمة العيش؟ - يتبقي ايه؟ المغرب العربي وده من اول ليبيا- اللي لحقها القذاقي وحط لباسه في بقه وجري علي اوروبا وامريكا وقدم قرابين السماح - لغاية موريتانيا كل دول تبع ما يطلق عليه المحيط الثقافي اللاتيني (منطقة اسبانيا فرنسا ايطاليا) والتى ترحب بسكان الدول دي دون اي مشاكل

محدش ابن كلب ومالهوش صاحب غيرالمصريين ليه مش فاهم مع ان احنا اول ناس اتصالحت مع اسرائيل اللي هي حاكمة ومسيطرة علي سياسات البلاد دي واكتر ناس ضحت علشان غيرها يعيش بقينا عاملين زي اللا مؤاخذة لا بتشتغل ولا تخلوا من النجاسة

احنا فعلا كدة ما تضحكوش، وهم دول غالبا العنصرين اللي اموت واعرف كان قصده ايه بيهم سيد درويش في غنوة انا المصري كريم العنصرين

انا المصري كريم البيضتين

يكونشي ده كريم مرطب لهذه المنطقة الحساسة من الجسم والتي تعاني الامرين في حر الصيف ولزوجة الرطوبة خاصة في الزحام؟

حتي بتوع افريقيا لما ربنا ابتدي يكرمهم ويقبوا علي وش الدنيا وماكانوش حيشوفوا الاستقلال في سنتهم لولا جهود مصر اداروا لنا مؤخراتهم السمراء الجميلة بحكم اننا بيض وهم سود، بيض بتاع ايه يعني؟ احنا في اوروبا سمر وافارقة وفي افريقيا بيض وفي الخليج شحاتين وفي المغرب كل تهمتنا ان احنا مصريين وفي السودان طمعانين نستعمرهم-احنا لاقيين ناكل لما حنستعمر؟؟

ان احنا مش افارقة تماما ده بيبان في تعنت الأفارقة مع الفرق المصرية ولودخلت من زاوية العروبة تطلعك حجة القومية والقبلية واذا نطيت من شباك الدين يقولك انت ارهابي يعني انت كدة كدة مرفوض ومش عارف الكلام ده لصالح مين؟ طبعا معروف اسرائيل

________________________________________________

وإلى اللقاء فى الحلقة القادمة

هناك تعليقان (٢):

غير معرف يقول...
أزال أحد مشرفي المدونة هذا التعليق.
aflam toreksh يقول...
أزال أحد مشرفي المدونة هذا التعليق.